Yevropa Ittifoqi 23-aprel kuni O‘zbekistondagi ikkita kompaniyaga, Raw Materials Cellulose va Farg‘ona kimyo zavodiga qarshi sanksiyalar kiritdi.
Farg‘ona kimyo zavodi paxta sellyulozasi ishlab chiqaradi. U Rossiyaning “Perm porox” zavodi va “Qozon porox” zavodiga mahsulotlar yetkazib beradi. Bu zavodlar esa paxta sellyulozasidan Rossiya Qurolli kuchlari uchun qurol ishlab chiqarishda foydalanishi aytilmoqda.
“Zavod harbiy texnologiyalar va uskunalar yetkazib berish zanjirida ishtirok etish orqali Rossiyaning harbiy-sanoat kompleksini qo‘llab-quvvatlamoqda”, deyiladi Yevropa Ittifoqi e’lon qilgan hujjatda.
Ma’lumotlarga ko‘ra, Farg‘ona kimyo zavodi Rustam Mo‘minov tomonidan nazorat qilinadi. Tadbirkorning o‘zi 2025-yil oktyabr oyi oxirida Yevropa Ittifoqining sanksiyalari ro‘yxatiga kiritilgandi.
Raw Materials Cellulose ham O‘zbekistonda faoliyat yurituvchi, paxta sellyulozasi ishlab chiqaruvchi kompaniyadir. U mahsulotni Rossiyaning harbiy-sanoat korxonalariga, jumladan, “Tambov porox” zavodiga yetkazib beradi. Ushbu korxona undan porox ishlab chiqarishda foydalanadi. Shu sababli Yevropa Ittifoqi uni sanksiyalar ro‘yxatiga kiritmoqda. Buyuk Britaniya va Ukraina allaqachon yuqoridagi kompaniyalarga sanksiyalar qo‘llagan.
