Angliyaning “Manchester Yunayted” klubi “Nyukasl Yunayted” yarim himoyachisi Sandro Tonaliga transferi bo‘yicha jiddiy qadam tashladi.
Insayder Fabritsio Romanoning xabar berishicha, mankunianliklar allaqachon jamoa rahbariyatining italiyalik yarim himoyachiga bo‘lgan qiziqishi haqida Tonalining agentlariga ma’lumot bergan va ular bilan ilk aloqalarni o‘rnatgan.
Shu bilan birga, hozircha hech qanday kelishuvga erishilmagani va muzokaralar hali dastlabki boshqichda ekani aytilmoqda. “Nyukasl Yunayted” rahbariyati yozgi transfer oynasi vaqtida Tonali atrofida jiddiy faollik yuzaga kelishini kutmoqda.
Shuningdek, “Nottingem Forest” yarim himoyachisi Elliot Anderson ham nomzodlar ro‘yxatida, biroq “Manchester Siti” hali ham futbolchi uchun kurashda peshqadamlik qilmoqda. Shu sabab Tonali transferi ehtimoli oshmoqda.
Joriy mavsumda Tonali barcha turnirlar doirasida 47 ta o‘yinda ishtirok etib, 3 ta gol va 7 ta samarali uzatmani amalga oshirdi. “Transfermarkt” portali taqdim etgan ma’lumotlarga ko‘ra, futbolchining bozor qiymati 80 million yevroni tashkil etadi.
