Jahon chempionati mezbonlaridan biri — Meksika Eron terma jamoasining barcha o‘yinlarini o‘z maydonlarida qabul qilishga tayyorligini bildirdi. Bu haqda mamlakat prezidenti Klaudiya Sheynbaum rasman bayonot bergan.
“Hozirda bu masala FIFA bilan muhokama qilinmoqda. Agar texnik jihatdan iloji bo‘lsa, nima uchun ular AQSHga borishi kerak? Meksika barcha o‘yinlarni o‘zida qabul qilishga tayyor va biz uchun hech qanday noqulaylik yo‘q”, dedi Sheynbaum.
Eslatib o‘tamiz, 28-fevral kuni AQSH va Isroilning Eronga qarshi harbiy amaliyot boshlagani sababli, Eron termasining AQSH hududiga borishi (guruh o‘yinlari o‘sha yerda rejalashtirilgan edi) xavfsizlik va siyosiy nuqtayi nazardan deyarli imkonsiz bo‘lib qolgan. Avvalroq Eron sport vaziri jamoa turnirda qatnashmasligini aytgan bo‘lsa-da, Osiyo Futbol Konfederatsiyasi hali rasmiy voz kechish xati olmaganini bildirdi.
Ma’lumot uchun, Eron “B” guruhidan joy olgan bo‘lib, Belgiya, Misr va Yangi Zelandiya bilan kuch sinashadi. Agarda FIFA Meksika taklifini qabul qilsa, Eronning o‘yinlari AQSHdan Meksikaga ko‘chirilishi mumkin.
