O‘zbekiston hududiga 9—12-mart kunlari sovuq va nam havo massalari kirib keladi.
“O‘zgidromet” prognozlariga ko‘ra, mamlakat bo‘yicha 9—11-martda vaqti-vaqti bilan yog‘ingarchilik (yomg‘ir yog‘adi, ba’zi joylarda qorga aylanadi) bo‘ladi. Respublikaning tog‘ oldi va tog‘li hududlarida yog‘ingarchilik (yomg‘ir, qor), ba’zi joylarda kuchli bo‘ladi.
Respublika bo‘yicha ba’zi joylarda shamol tezligi 15-20 metr/sekundgacha kuchayadi, ayrim joylarda ba’zida 22-25 metr/sekundgacha kuchayishi mumkin.
10—12-mart kunlari havo harorati respublika shimolida kechalari 7-10 daraja sovuqqacha, kunduz kunlari 0-3 daraja sovuqqacha, qolgan hududlarda 11—12 martda kechalari 0-3 daraja sovuqqacha, kunduz kunlari 2-5 daraja iliqqacha pasayadi.
Bundan avval “O‘zgidromet” 7 va 9—10-mart kunlari yomg‘ir yog‘ishi kutilayotgani sababli respublikaning tog‘ oldi va tog‘li hududlarida sel-suv toshqini xavfi borligidan ogohlantirgandi.
