Kosmik tadqiqotlar va texnologiyalar agentligi direktori o‘rinbosari Muhiddin Ibrohimov O‘zbekistonning ilk ilmiy sun’iy yo‘ldoshi Yaponiyada yig‘ilayotganini ma’lum qildi. Bu haqda “O‘zbekiston 24” telekanali efirida xabar berildi.
Prezidentga namoyish etilgan taqdimotda qayd etilishicha, loyiha doirasida yetti nafar o‘zbekistonlik talaba Yaponiyaning Kyutech institutida amaliy ishlarda ishtirok etmoqda. Aynan shu yerda mamlakatning birinchi ilmiy sun’iy yo‘ldoshi ustida yig‘ish va sinov jarayonlari olib borilmoqda.
Sun’iy yo‘ldosh yerni masofadan zondlash va ilmiy tadqiqotlarni amalga oshirishga mo‘ljallangan. Mutaxassislar qurilmaning konstruksiyasi, foydali yuklamasi, quyosh panellari va orbitadagi ishlash mexanizmlari bo‘yicha texnik yechimlar ishlab chiqayotgani qo‘shimcha qilingan.
Mas’ullarga loyiha bo‘yicha hisob-kitoblarni aniqlashtirish, boshqaruv va ma’lumotlarni qayta ishlash infratuzilmasini shakllantirish yuzasidan topshiriqlar berilgan. Shuningdek, milliy kosmik dastur doirasida ilmiy kadrlar tayyorlashni kengaytirish vazifasi qo‘yilgan.
Shuningdek, 2028-yilda Samarqand shahrida kosmos bo‘yicha xalqaro kongress o‘tkazish masalalariga ham to‘xtalib o‘tilgan. Unda AQSH, Yevropa, Xitoy, Hindiston, Rossiya va boshqa davlatlarning yetakchi kosmik tashkilotlari ishtirok etishga qiziqish bildirgan.
