Havaskorlar o‘rtasida Jahon chempioni, hozirda professional boksda uchta jang o‘tkazib, mag‘lubiyatsiz harakat qilayotgan o‘zbekistonlik charm qo‘lqop ustasi Ruslan Abdullayevning navbatdagi jangi sanasi va raqibi ma’lum bo‘ldi. Bu haqda O‘zbekiston boks federatsiyasi matbuot xizmati xabar berdi.
Unga ko‘ra, 16-yanvar, juma kuni AQSHning Kaliforniya shtati, Palm-Dezert shahrida bo‘lib o‘tadigan professional boks oqshomi doirasida ringga ko‘tariladi. Mazkur turnir Golden Boy promouterlik kompaniyasi tomonidan tashkil etilmoqda.
Ushbu bahsda uning raqibi urugvaylik Eduardo Xavyer Abreu bo‘ladi. 37 yoshli charm qo‘lqop ustasi faoliyati davomida 17 ta jang o‘tkazib, 14 ta g‘alaba, 1 ta mag‘lubiyat va 2 ta durang qayd etgan.
Ma’lumot uchun, Ruslan Abdullayev 2023-yilda Toshkent shahrida o‘tkazilgan IBA Jahon chempionatida -63,5 kg vazn toifasida oltin medalni qo‘lga kiritgan. U professional boksdagi debyut jangini 2025-yil mart oyida Xose Alvaradoga (3-19-1, 2 KO) qarshi o‘tkazib, ikkinchi raundda uni nokautga uchratgan edi. Keyingi jangida Abdullayev Jino Rodrigoni (13-4-2, 11 KO) hakamlarning yakdil qarori bilan (80-71) mag‘lub etdi. Uchinchi jangda esa Kevin Jonsonga (12-7, 8 KO) qarshi ringga chiqib, hakamlar qaroriga ko‘ra (80-72, 79-73, 79-73) g‘alaba qozongan.
