Eronda 28-dekabrdan buyon davom etayotgan norozilik namoyishlarida halok bo‘lganlar soni kamida 45 kishiga yetdi. Namoyishlar fonida mamlakat bo‘ylab internet uzib qo‘yildi. Bu haqda Deutsche Welle xabar berdi.
Namoyishchilar 8-yanvar kuni Tehronning asosiy ko‘chalaridan biri — Oyatulloh Koshoniy xiyobonini to‘sib qo‘ydi. Xavfsizlik kuchlari niqob taqqan namoyishchilarga qarshi ko‘zdan yosh oqizuvchi gaz qo‘llamoqda. Mashhad, Kirmonshoh va boshqa yirik shaharlarda ham ommaviy norozilik namoyishlari kuzatilmoqda.
AQSH prezidenti uning ma’muriyati vaziyatni diqqat bilan kuzatib borayotganini bildirdi. Namoyishlar boshlanganidan beri Norvegiyaning Iran Human Rights (IHR) tashkiloti kamida 45 nafar kishi halok bo‘lganini qayd etgan. Ular orasida sakkiz nafar voyaga yetmagan bola ham bor.“Men ularga agar odamlarni o‘ldirishni boshlashsa, qattiq choralar ko‘rishimizni aniq tushuntirdim. Ular tartibsizliklar paytida tez-tez shunday qiladi, ularda tartibsizliklar ko‘p kuzatiladi”, dedi u va eronliklarni “jasur xalq” deb atadi.
Eronda norozilik namoyishlari rial kursining qulashi fonida boshlandi
Eronda 28-dekabrdan buyon ommaviy ko‘cha namoyishlari davom etmoqda. Noroziliklar Tehronning asosiy bozorida boshlangan, dastlab do‘kondorlar giperinflyatsiya va narxlarning keskin o‘zgarishiga qarshi savdo nuqtalarini yopgan. Eron iqtisodiyoti xalqaro sanksiyalar sabab jiddiy bosim ostida qolmoqda. Xususan, milliy valyuta — rial 2025-yil davomida AQSH dollariga nisbatan qiymatining uchdan biridan ko‘prog‘ini yo‘qotgan.
Hukumat 4-yanvar kuni iqtisodiy bosimni yumshatish maqsadida har bir fuqaro uchun oylik nafaqa joriy etilishini e’lon qilgan. Ushbu to‘lov o‘rtacha oylik ish haqining taxminan 3,5 foiziga teng. Aholisi 90 milliondan ortiq bo‘lgan Eronda eng kam ish haqi taxminan 100 dollar, o‘rtacha oylik maosh esa 200 dollar atrofida.
