O‘zbekistonda 2030-yilgacha aholining o‘rtacha umr davomiyligi 78 yoshga yetkazish maqsad qilingan. Bu haqda “O‘zbekiston–2030” strategiyasining takomillashtirilgan loyihasida ko‘zda tutilgan.
Bunda o‘rtacha umr davomiyligini- 2026-yilda — 75,5 yoshga;
- 2027-yilda — 76 yoshga;
- 2028-yilda — 76,8 yoshga;
- 2029-yilda — 77,5 yoshga;
- 2030-yilda — 78 yoshga yetkazish maqsad qilingan.
Shuningdek:
- yurak qon-tomir kasalliklaridan erta o‘limni (30-69 yosh) 27 foizgacha kamaytirish;
- saraton kasalligidan erta (30-69 yosh) o‘limni 5,2 foizgacha kamaytirish;
- qandli diabet kasalligi bor bemorlarni davolash bilan 100 foiz qamrovini ta’minlash;
- nafas yo‘llari kasalligidan erta o‘limni (30-69 yosh) 1,5 foizdan oshmasligini ta’minlash;
- sil kasalligi bilan kasallanish darajasini 33 foizdan yuqori bo‘lmasligini ta’minlash rejalashtirilmoqda.
Milliy statistika qo’mitasi ma’lumotlariga ko‘ra, O‘zbekistonda doimiy aholining o‘rtacha umr ko‘rish davomiyligi dinamikasi quyidagicha bo‘lgan:
- 1991-yilda — 66,4 yosh;
- 1995-yilda — 69,1 yosh;
- 2000-yilda — 70,8 yosh;
- 2005-yilda — 71,8 yosh;
- 2010-yilda — 73 yosh;
- 2015-yilda — 73,6 yosh;
- 2020-yilda — 73,4 yosh;
- 2023-yilda — 74,7 yosh;
- 2024-yilda — 75,1 yosh.
Prezident Shavkat Mirziyoyev 2025-yilning avgustida Mustaqillik kuni munosabati bilan bayram tantanasida so‘zga chiqqanida so‘nggi yillarda tibbiyot uchun ajratilayotgan mablag‘lar 6 karra oshirilganini, aholining turmush sharoitlari yaxshilanib borayotgani natijasida o‘rtacha umr ko‘rish darajasi 73,8 yoshdan 75,1 yoshga uzayganini qayd etgandi.
