Ispaniya Venesueladagi mojaroni hal etishga ko‘maklashishga tayyor. Bu haqda qirollik Tashqi ishlar vazirligi matbuot xizmati xabar berdi.
Shuningdek, bayonotda Ispaniya tomoni Karakasdagi elchixona hamda favqulodda vaziyatlar bo‘yicha konsullik xizmati bilan doimiy aloqada ekani, mamlakatdagi ispan diasporasining ahvolini nazorat qilib turishi aytilgan.“Ispaniya vaziyatni yumshatish va bosiqlik saqlanishiga, shuningdek, xalqaro huquq va BMT nizomi tamoyillariga doimiy hurmat asosida harakat qilinishiga chaqirmoqda. Shu munosabat bilan Ispaniya hozirgi inqirozni tinch yo‘l bilan va kelishilgan tarzda hal etish uchun o‘z xizmatlarini taklif etishga tayyor”, deyiladi xabarda.
Avvalroq AQSH prezidenti Donald Tramp AQSH harbiy kuchlari Venesuelaga zarba berganini tasdiqlagan. Shuningdek, u mamlakat rahbari Nikolas Maduro rafiqasi bilan birga Amerikaning Delta maxsus bo‘linmasi jangchilari tomonidan qo‘lga olinib, Venesueladan olib chiqib ketilganini ma’lum qildi.
Trampning aytishicha, Venesueladagi operatsiya puxta rejalashtirilgan bo‘lib, unga ko‘plab harbiylar jalb etilgan.
AQSH prezidentining milliy xavfsizlik bo‘yicha maslahatchisi Marko Rubio respublika prezidenti Nikolas Maduro hibsga olinganidan so‘ng Vashingtonning Venesuelaga nisbatan keyingi harakatlari kutilmayotganini bildirdi.
