Avstraliyadagi plyajda 14-dekabr kuni noma’lum shaxslar odamlarga qarata bir necha bor o‘q uzdi. Bu haqda The New York Times xabar berdi.
Hodisa Sidneydagi Bondi plyajida sodir bo‘lgan. Otishma oqibatida kamida 10 kishi jarohat olgan, qurbonlar haqida ma’lumot berilmagan. Politsiya fuqarolardan plyaj hududidan uzoqroq turishni so‘rab ogohlantirish e’lon qilgan.
Otishma yahudiylarning Xanuka bayrami nishonlanayotgan paytda yuz bergan. Mahalliy manbalarga ko‘ra, kamida 50 marta o‘q uzilgan. Hodisa bo‘yicha ikki nafar gumonlanuvchi qo‘lga olingan.
“Hududdagi barcha fuqarolar zudlik bilan boshpana topishi kerak”, deya bayonot berdi politsiya.
Huquq-tartibot idoralari hozircha hodisaning tafsilotlarini oshkor qilmayapti. Sidneyning sharqiy qirg‘og‘ida joylashgan Bondi plyaji uzunligi 3 ming futdan ortiq bo‘lib, Avstraliyaning eng mashhur plyajlaridan biri hisoblanadi.
