“Manchester Siti” 23 yoshli ingliz futbolchisi, “Nyukasl”ning o‘ng qanot himoyachisi Valentino Livramentoga jiddiy qiziqish bildirmoqda. Bu haqda jurnalist Ben Jeykobs X (sobiq Twitter) sahifasida ma’lum qildi.
Unga ko‘ra, “shaharliklar” 2026-yilning yozgi transfer oynasi vaqtida uni o‘z safiga qo‘shib olishga harakat qilib ko‘radi. Shuningdek, jurnalistning yozishicha, Valentinoga Manchesterning boshqa bir jamoasi “Manchester Yunayted” ham qiziqish bildirmoqda, ammo “qizil iblislar” hozircha Livramento bo‘yicha aniq taklif yubormagan.
“Manchester Siti” joriy mavsum boshlanishidan oldin ham himoyachiga qiziqish bildirgan va u uchun 65 million funt sterling (taxminan 75 million yevro) taklif qilishga tayyor ekani haqida xabarlar tarqalgan edi. Biroq transfer noma’lum sabablarga ko‘ra amalga oshmagan.
“Nyukasl” esa futbolchini sotmoqchi emas. Shu bois klub rahbariyati futbolchini jamoada saqlab qolish uchun uni eng yuqori maosh oluvchi futbolchilardan biriga aylantirishni rejalashtirmoqda. “Qarg‘alar” Livramentoga olti yillik yangi shartnoma taklif qilishni mo‘ljallamoqda.
Livramento hozirgi klub bilan 2028-yil yozigacha shartnoma imzolagan. Transfermarkt portali futbolchining bozor qiymatini 40 million yevroga baholamoqda. Joriy mavsumda u sakkizta uchrashuvda maydonga tushib, birta golli uzatma amalga oshirgan.
