Jinoyat ishlari boʻyicha Quva tuman sudi Fargʻona viloyatining Furqat tumani IIB sobiq boshligʻi va uning oʻrinbosariga oid jinoyat ishi boʻyicha sud majlisini 12-noyabr kuni davom ettirdi. Bu galgi sud jarayoni ochiq tarzda oʻtkazilib, unda OAV vakillari va blogerlar, jumladan, “Daryo” nashri muxbiri ham ishtirok etdi.
Guliraʼno Qosimova ham sudga iltimosnoma kiritib, sudda ishtirok etayotgan OAV vakillariga mazkur jarayonni foto va videoga olishiga ruxsat berilishini soʻradi. Biroq bu iltimosnoma ham rad etildi.
Shundan soʻng jabrlanuvchi va guvohlar yuzlashtirildi hamda ularning koʻrsatmalari tinglandi. Advokatlar har ikki tomonga ham oʻzlarini qiziqtirgan va aniqlik kiritilishi zarur boʻlgan savollar bilan yuzlandi.
Sud majlisining yopiq qismida mazkur ish bilan bogʻliq voqealar aks etgan videolavha OAV ishtirokisiz koʻrib chiqildi. Jabrlanuvchining bildirishicha, mazkur videoning toʻliq koʻrinishi hozirgacha topilmagan.
Sud tanaffusi chogʻida Guliraʼno Qosimova “Daryo” muxbiri bilan muloqotda boʻlib, bugungi jarayonlar ochiq tartibda oʻtayotganligi va unda jurnalistlar, blogerlar ishtirok etayotganidan qoniqish bildirdi.
Kurashaman, oxirigacha boraman baribir. Bu jarayonlar yakuniga yetganidan keyin biroz tin olish haqida oʻylab koʻrish mumkin, chunki boʻlib oʻtgan ishlardan soʻng oʻzimga kelib olishim uchun maʼlum muddat kerak boʻladi, deydi Guliraʼno Qosimova.
Keyingi sud muhokamasi joriy yil 14-noyabr kuniga belgilandi.
Jabrlanuvchi Guliraʼno Qosimova avvalroq Prezident Administratsiyasi va Oliy sudga murojaat qilib, sud majlislari adolatsiz oʻtayotganini aytgandi. Uning taʼkidlashicha, sudyaga eʼtiroz bildirgani uchun u sud zalidan chiqarib yuborilgan.
