Yaponiyaning shimoli-sharqida 9-noyabr kuni 6,9 magnitudali zilzila ro‘y berdi. Oqibatda ayrim sohil hududlarida kichik sunami to‘lqinlari kuzatildi va aholi vaqtincha evakuatsiya qilindi. Bu haqda Kyodo News xabar berdi.
Zilzila tafsilotlari
Yaponiya meteorologiya agentligining ma’lum qilishicha, zilzila Sanriku sohillaridan 16 kilometr chuqurlikda, mahalliy vaqt bilan soat 17:03 da yuz bergan. Dastlab magnituda 6,7 deb baholangan bo‘lsa-da, keyinroq 6,9 ga o‘zgartirilgan. Agentlik Ivate prefekturasi uchun 1 metrgacha sunami xavfi haqida ogohlantirish bergan.
Zarar va chora-tadbirlar
Ivate va Miyagi prefekturalarining ayrim joylarida zilzila kuchi Yaponiyaning 7 ballik shkalasida 4 ball deb qayd etilgan. Hech qanday jarohatlanganlar yoki jiddiy zarar haqida xabar berilmagan. Ofunato, Rikuzentakata va Otsuchi shaharlarida aholisi vaqtincha evakuatsiya qilingan, biroq kechga borib buyruq bekor qilingan.
Tsunami va transportdagi uzilishlar
Kuji va Ofunato shaharlarida 20 santimetr, Miyako va Kamaishi hududlarida esa 10 santimetr balandlikdagi to‘lqinlar qayd etilgan. Zilzila oqibatida Tohoku shinkansen tezyurar poyezdlarining Senday–Shin-Aomori yo‘nalishidagi harakati vaqtincha to‘xtatilgan. Keyinroq elektr ta’minoti tiklangach, harakat qayta yo‘lga qo‘yilgan.
