Elit Osiyo Chempionlar Ligasi 4-turidan o‘rin olgan “Nasaf” hamda Birlashgan Arab Amirliklarining “Al-Vahda” jamoalari o‘rtasidagi bahs yakuniga yetdi. Qarshidagi “Markaziy” stadionida kechgan uchrashuvda amirliklar jamoasi 2:1 hisobida g‘alaba qozondi.
O‘yindagi hisob 42-daqiqada Sardorbek Bahromov tomonidan ochildi. Futbolchi jarima maydonchasi tashqarisidan ajoyib zarba yo‘llab, “Nasaf”ni hisobda oldinga olib chiqdi. Ikkinchi bo‘lim boshida, aniqrog‘i 52-daqiqada tablodagi natija tenglashdi. Dushan Tadichning uzatmasidan keyin Inyeka Ogbu Abduvohid Ne’matov darvozasini ishg‘ol qildi. O‘yin yakuni arafasida “Al-Vahda” g‘alabani ilib ketdi. Kayo Kanedo 89-daqiqada “Nasaf” darvozabonini ikkinchi marta dog‘da qoldirib, jamoasiga muhim g‘alabani taqdim etdi.
Shu tariqa, “Nasaf” Elit Osiyo Chempionlar Ligasi 4-turidan o‘rin olgan uchrashuvda ham mag‘lubiyatga uchradi. Ro‘ziqul Berdiyev jamoasi hozirda turnir jadvalining oxirgi pog‘onasini egallab turibdi (0 ochko). G‘alaba qozongan “Al-Vahda” esa 10 ochko bilan 1-o‘rindan joy olgan.
Elit Osiyo Chempionlar Ligasi
4-tur
“Nasaf” — “Al-Vahda” 1:2
Gollar: 1:0 — Bahromov (42), 1:1 — Ogbu (52), 1:2 — Kanedo (89)
