Kolumbiya prezidenti Gustavo Petroning samolyotiga AQSH sanksiyalari tufayli Ispaniya hududida yonilg‘i berilmadi. Bu haqda Ispaniyaning El Pais nashri xabar berdi.
Petro bu hafta rasmiy tashrif bilan Yaqin Sharq davlatlarida bo‘ladi. Uning samolyoti Saudiya Arabistoniga ketayotib yonilg‘i quyish uchun Madriddagi Baraxas aeroportiga qo‘ngan. Biroq barcha yonilg‘i kompaniyalari AQSH sanksiyalarini buzishdan qo‘rqib, samolyotga xizmat ko‘rsatishdan bosh tortgan. Natijada prezident borti yo‘nalishni o‘zgartirishga va yonilg‘i quyishning muqobil variantlarini izlashga majbur bo‘lgan. Oxir-oqibat muammoni Ispaniya hukumati hal qilgan: samolyot harbiy aviabazaga ko‘chirilgan. Uchoq u yerda yonilg‘i quyib, yo‘nalishini davom ettira olgan.
Kolumbiya hukumati voqeani “yo‘l qo‘yib bo‘lmaydigan” va delegatsiya xavfsizligi uchun xavf tug‘dirgan holat deb baholagan. O‘tgan haftada Kolumbiya prezidenti AQSH giyohvand moddalar savdosi bilan aloqadorlikda ayblanayotgan shaxslar (OFAC)ro‘yxatiga kiritildi. AQSH Moliya vazirligi da’vosiga ko‘ra, prezident “narkotiklarning noqonuniy aylanishida muhim rol o‘ynaydi” va “Kolumbiyada kokain ishlab chiqarishning keskin o‘sishiga, narkoterroristik tashkilotlarga imtiyozlar berishga” mas’ul.
Siyosatchining o‘zi mazkur ayblovlarni rad etib kelmoqda. Kolumbiya hukumati Petroning sanksiyalar ro‘yxatiga kiritilishini “prezidentning sha’ni va qadr-qimmatini kamsituvchi haqoratli harakat” deb atadi. Shu munosabat bilan hukumat AQSHdagi elchisi Daniel Garsiya-Penyani maslahatlashuv uchun chaqirib oldi.
