Turkiya aeroportida 61 kilodan ortiq oltinni yashirincha olib o‘tmoqchi bo‘lgan 5 nafar o‘zbekistonlik qo‘lga olindi. Bu haqda Haber Turk nashri xabar berdi.
Ma’lum qilinishicha, ular O‘zbekistondan Istanbul orqali Kappadokiya viloyatining Nevshexir aeroportiga uchib kelgan. Tekshiruv davomida ushbu shaxslarning bagajlaridan 61 kilogramm 121 gramm oltin aniqlangan. Qimmatbaho metall go‘sht qiymalagichlar ichiga ehtiyot qismlar shaklida eritilib joylashtirilgan.
Nevshexir viloyati politsiyasining kontrabanda va uyushgan jinoyatchilikka qarshi kurash bo‘limi xodimlari gumondorlar haqida avvaldan ma’lumotga ega bo‘lgan. Aeroportda ularni kutib olish uchun kelgan shaxs ham qo‘lga olingan. Qo‘lga olinganlarning 3 nafari ayollar bo‘lgan. Gumondorlarning barchasi politsiya idorasida so‘roq qilinganidan so‘ng sudga yuborilgan.
Oltinlarning bozor qiymati taxminan 350 million turk lirasiga (taxminan 833 ming dollar) teng bo‘lgan.
