Madridning “Real” klubi hujumchisi Kilian Mbappe “Barselona” vingeri Lamin Yamalning shaxsiy hayoti atrofidagi muhokamalarga munosabat bildirdi. Bu haqda COPE nashri xabar berdi.
Fransiyalik yulduz futbolchining fikricha, Yamalning shaxsiy hayotiga aralashish kerak emas:
“Yamal haqida haddan tashqari ko‘p gapirishmoqda. Menimcha, uni tinch qo‘yish kerak. U maydonda juda yaxshi futbolchi, lekin hayotda atigi 18 yoshli yigit. U e’tiborini faqat futbolga qaratishi lozim, qolgan narsalar muhim emas. Har qanday yosh futbolchi kabi, u ham xatolarga yo‘l qo‘yishi mumkin. Menimcha, Yamal juda iste’dodli va kelajakda futbol tarixidagi eng zo‘r o‘yinchilardan biriga aylanishi mumkin”, dedi Mbappe COPE nashriga bergan intervyusida.
Ma’lumot uchun, joriy mavsumda 18 yoshli Yamal barcha musobaqalar doirasida 5 ta o‘yinda maydonga tushib, o‘z hisobiga 2 ta gol va 4 ta golli uzatma yozdirib qo‘ygan. Uning “Barselona” bilan shartnomasi 2031-yil yozigacha amal qiladi. Transfermarkt portali futbolchining qiymatini 200 million yevroga baholagan.
