O‘zbekiston futbol assotsiatsiyasi (O‘FA) italiyalik mashhur mutaxassis Fabio Kannavaro bilan muzokaralarni boshlagan. Bu haqda taniqli insayder Fabritsio Romano o‘zining X (sobiq Twitter) sahifasida ma’lum qildi.
Romano bergan xabarga ko‘ra, O‘FA rahbariyati Kannavaroni O‘zbekiston milliy terma jamoasining bosh murabbiyi etib tayinlash bo‘yicha muzokaralar olib bormoqda. Agar kelishuv muvaffaqiyatli yakunlansa, 2006-yilgi “Oltin to‘p” sohibi 2026-yilgi jahon chempionati oldidan “oq bo‘rilar” bosh murabbiyiga aylanishi mumkin.
Avvalroq OAVda italiyalik murabbiy O‘zbekiston futbol assotsiatsiyasi taklifini rad etgani haqida xabarlar tarqalgan edi. Sabab sifatida uning Yevropa klublaridan taklif kutayotgani, shu bois terma jamoalardan tushayotgan takliflarga javob bermayotgani aytilgan edi. Biroq Romano bergan so‘nggi ma’lumotga ko‘ra, hozirda Kannavaro O‘FA bilan rasmiy muzokaralar o‘tkazmoqda.
Ma’lumot uchun, Fabio Kannavaro Osiyo qit’asida murabbiylik tajribasiga ega. U avvalroq Birlashgan Arab Amirliklari, Xitoy va Saudiya Arabistoni klublarida, shuningdek, Xitoy terma jamoasida ham faoliyat olib borgan. Shuningdek, Italiyaning “Benevento”, “Udineze” hamda Xorvatiyaning “Dinamo Zagreb” klublarida bosh murabbiy sifatida ishlagan.
Fabio Kannavaroniing so‘nggi ish joyi — Xorvatiyaning “Dinamo Zagreb” klubi bo‘lib, u 2025-yil 9-aprel kuni jamoaning qoniqarsiz natijalari sababli lavozimidan ozod etilgan.
