Bugun, 23-sentyabr kuni Donald Tramp BMT Bosh assambleyasi sammitida nutq so‘zladi. U G‘azodagi vaziyatga to‘xtalib, Falastin davlatini tan olish HAMAS uchun mukofot bo‘lishini ta’kidladi.
Trampning so‘zlariga ko‘ra, HAMAS bir necha marta tinchlik borasida bildirilgan takliflarni rad etgan.
Tramp jahon hamjamiyatini HAMASga yon berish o‘rniga yagona g‘oya ostida birlashishga chaqirdi.“Afsuski, HAMAS tinchlik yo‘lidagi oqilona takliflarni bir necha marta rad qildi. Endi esa BMTning ayrim a’zolari Falastinni mustaqil davlat sifatida tan olmoqda. Bu urushni rag‘batlantirish sifatida baholanadi. Falastinni tan olish HAMAS katta mukofot bo‘ladi”, — dedi AQSH yetakchisi.
BMT Bosh assambleyasi sammiti boshlanishi arafasida Buyuk Britaniya, Fransiya, Kanada, Avstraliya va Portugaliya kabi bir necha davlatlar Falastinni davlat sifatida tan olishini e’lon qildi. Umuman olganda, BMTga a’zo 193 davlatdan 145 tasi Falastinni tan olgan.“Asirlarni ozod qiling. Hech qanday shartlarsiz shunchaki ozod qiling. Biz G‘azodagi urushni to‘xtatishimiz kerak. Zudlik bilan muzokaralar o‘tkazib, tinchlik haqida kelishib olishimiz lozim”, — dedi Qo‘shma Shtatlar prezidenti.
