O‘zbekistonda dam olish kunlari havo harorati asta-sekin ko‘tariladi.
“O‘zgidromet” prognozlariga ko‘ra, 19—21-sentyabr kunlari O‘zbekiston hududining katta qismida havo biroz bulutli, ba’zi joylarda o‘zgaruvchan bo‘ladi, yog‘ingarchilik kutilmaydi. Havo harorati asta-sekin ko‘tariladi.
Juma kuni kunduzi havo 25-28 darajagacha, janubda 30 darajagacha isiydi. Shanba kuni cho‘l hududlarda va respublika janubida, yakshanba kuni O‘zbekistonning markaziy hududlari bo‘yicha kunduzgi harorat 32-34 darajaga yetadi.
20—21-sentyabr kunlari Qoraqalpog‘iston Respublikasi va Xorazm viloyatida ba’zi joylarda qisqa muddatli yomg‘ir yog‘adi, momaqaldiroq bo‘lishi mumkin. Havo harorati 23-28 daraja atrofida bo‘ladi.
Shimolda va cho‘l hududlarda ba’zi joylarda shamol tezligi 13-18 metr/sekundgacha kuchayishi, ayrim joylarda chang-to‘zon bilan kuzatilishi mumkin.
Toshkentda havo biroz bulutli, vaqti-vaqti bilan o‘zgaruvchan bo‘ladi, yog‘ingarchilik kutilmaydi. Kunduzi havo harorati juma kuni 26 daraja, shanba kuni 28-30 daraja, yakshanba kuni 32-34 daraja atrofida bo‘ladi.
O‘zbekistonda 19-sentyabrdan salqin havo massalari respublika hududidan chekina boshlashi prognoz qilingandi.
