Bugun, 28-avgust kuni ijtimoiy tarmoqlarda aslida joriy yil 8-iyun kuni Asaka tumanida roʻy bergan holat tasvirlangan video tarqaldi. Oliy sud jinoyat ishi sudda koʻrib chiqilib, 27-avgust kuni sud hukmi eʼlon qilinganini bildirdi.
Videoda 22, 23 va 24 yoshli yigitlar ikki kishini qattiq kaltaklagani aks etgan. Kaltaklanganlardan biri yengil, ikkinchisi ogʻir tan jarohati olgan.“Jinoyat ishi boʻyicha jabrlanuvchilar B. R. va D. X. sudga ariza taqdim qilib, sudlanuvchilarga nisbatan hech qanday daʼvolari yoʻqligini hamda ularga nisbatan ozodlikdan mahrum qilish bilan bogʻliq boʻlmagan jazo tayinlashni soʻragan”, deyiladi Oliy sud xabarida.
Shu tariqa jinoyat ishlari boʻyicha Asaka tuman sudi tomonidan sudlanuvchilar Jinoyat kodeksining 277-moddasi (bezorilik) 3-qismi “g” bandi bilan aybli deb topilgan. Ularning har biriga mazkur modda sanksiyasida mavjud boʻlgan ozodlikdan mahrum qilish bilan bogʻliq boʻlmagan uch yil muddatga ozodlikni cheklash jazosi tayinlangan.
