Yevropa futbol assotsiatsiyalari ittifoqi (UEFA) Fransiyaning “Pari Sen-Jermen” klubiga Chempionlar Ligasi finalida muxlislar tomonidan yo‘l qo‘yilgan tartibsizliklar sabab jarima qo‘lladi. Bu haqda tashkilotning rasmiy saytida ma’lumot berildi.
Ma’lum qilinishicha, UEFA “PSJ” klubiga jami 148 ming yevro miqdorida jarima belgilagan. Jarima qo‘llanishiga bir nechta holatlar — muxlislarning maydonga tushib ketishi, pirotexnika vositalaridan foydalanish hamda tribunadan begona buyumlar uloqtirilishi sabab bo‘lgan.
Shuningdek, UEFA qaroriga ko‘ra, Parij klubining muxlislari navbatdagi Yevrokuboklaridagi safar uchrashuvlari uchun chiptalar xarid qilish huquqidan mahrum etildi.
Eslatib o‘tamiz, Chempionlar Ligasi finalida “Pari Sen-Jermen” Italiyaning nomdor klubi — “Inter” ustidan 5:0 hisobida g‘alaba qozonib, turnir g‘olibiga aylangandi. Bu parijliklar tarixidagi ilk YCHL g‘olibligi hisoblanadi. Shuni ham ta’kidlash kerakki, “PSJ” ushbu mavsumda ko‘plab sovrinlarni qo‘lga kiritdi. Xususan, Fransiya chempionligi, kubogi va Superkubogida zafar quchib, bir mavsum ichida 4 ta kubok yutgan birinchi fransuz jamoasiga aylandi.
