UEFA Chempionlar Ligasining 1/4 final bosqichi dastlabki uchrashuvlari davom ettirildi.
“Barselona” — “Atletiko”
Kunning eng shiddatli o‘yinida Kataloniyaning “Barselona” klubi o‘z maydonida Madridning “Atletiko” jamoasini qabul qildi va 0:2 hisobida mag‘lub bo‘ldi.
Uchrashuvning dastlabki daqiqalaridanoq mezbonlar to‘p nazorati va hujumkorlikka urg‘u berdi. “Matraschilar” esa o‘yinni asosan tezkor qarshi hujumlar bilan o‘tkazdi.
44-daqiqada “ko‘k-anorranglilar” himoyachisi Pau Kubarsi Juliano Simeonega nisbatan ishlatgan qo‘polligidan so‘ng qizil kartochka olib, maydonni tark etdi. 45-daqiqada Xulian Alvares belgilangan jarima zarbasini qoyilmaqom tarzda ijro etdi va hisobni ochdi.
Ikkinchi taymda “Barselona” to‘p nazorati bo‘yicha ustunlikka erishdi. Biroq 70-daqiqada Aleksandr Syorlot jamoasining ikkinchi golini kiritdi.
Jamoalar o‘rtasidagi javob o‘yini 14-aprel kuni Madrid shahridagi “Metropolitano” stadionida bo‘lib o‘tadi.
UEFA Chempionlar Ligasi
1/4 final, dastlabki uchrashuv
“Barselona” — “Atletiko” 0:2
Gollar: 0:1 — Alvares (45), 0:2 — Syorlot (70)
“PSJ” — “Liverpul”
Kunning yana bir bahsi Parij shahridagi “Park de Prens” stadionida bo‘lib o‘tdi.
Unda UEFA Chempionlar Ligasining amaldagi g‘olibi “Pari Sen-Jermen” klubi Angliyaning “Liverpul” jamoasiga qarshi o‘yin o‘tkazdi. Uchrashuv 2:0 hisobida yakunlandi.
O‘yin to‘liqligicha mezbonlar ustunligi ostida o‘tdi. Hisob 11-daqiqada parijliklar hujumchisi Desire Due tomonidan ochildi. Ikkinchi bo‘limni ham “PSJ” faol o‘tkazdi. 65-daqiqada jamoa vingeri Xvicha Kvaratsxeliya ikkinchi golga mualliflik qildi
Jamoalar o‘rtasidagi javob o‘yini 14-aprel kuni Liverpul shahridagi “Enfild” stadionida bo‘lib o‘tadi.
UEFA Chempionlar Ligasi
1/4 final, dastlabki uchrashuv
“PSJ” — “Liverpul” 2:0
Gollar: 1:0 — Due (11), 2:0 — Kvaratsxeliya (65)
