Prezident matbuot kotibining xabar berishicha, endilikda har qanday normativ-huquqiy hujjat va loyiha Prezident Administratsiyasi huzuridagi ilmiy-tahliliy institutlar tadqiqotlari, olimlar, mahalliy va xorijiy ekspertlarning tavsiyalari asosida ishlab chiqiladi.
Muhim yo‘nalishlar loyiha ofislari orqali amalga oshiriladi. Administratsiya faoliyatida “komplayens” tizimi yo‘lga qo‘yiladi. Bu esa shaffoflikni ta’minlash, ijro intizomini mustahkamlash va korrupsiya holatlarining oldini olishga xizmat qiladi.
Ayrim yo‘nalishlarda prezident vakillari lavozimlari joriy etildi. Shuningdek, Axborot va ommaviy kommunikatsiyalar agentligi (AOKA) faoliyati tugatilib, uning asosida Milliy kontent ishlab chiqaruvchi markaz tashkil etilmoqda.
Davlat idoralarining jamoatchilik oldidagi hisobdorligi oshirilmoqda. Matbuot kotiblari instituti yanada mustahkamlanadi, aholi bilan kommunikatsiya qilish va ommaviy axborot vositalari bilan ishlashning yangi tizimi joriy etilmoqda.
AOKA haqida
AOKA Prezident Administratsiyasi huzurida tashkil etilgan axborot sohasida yagona davlat organi bo‘lib, 2019-yil 2‑fevraldagi farmonga asosan tashkil etilgan. Shu kundan boshlab 2020-yilga qadar Komil Allamjonov ushbu tuzilmaning birinchi rahbari sifatida faoliyat yuritgan. 2020-yil iyul oyidan beri Asadjon Xodjayev direktor lavozimida ishlamoqda.
AOKA O‘zbekistonda davlat hokimiyati organlari, davlat va xo‘jalik boshqaruvi organlari, respublika ahamiyatiga molik idora, muassasa hamda boshqa tashkilotlar axborot xizmatlari faoliyatini muvofiqlashtiradi hamda matbuot kotiblarini attestatsiyadan o‘tkazadi.
Izoh (0)