Turkiya prezidenti Rajab Toyyib Erdo‘g‘on Donald Trampdan G‘azo insonparvarlik yordam markazlari atrofida sodir bo‘layotgan otishmalarni to‘xtatishda yordam so‘radi.
Erdo‘g‘on amerikalik hamkasbi bilan bu haqda Niderlandiyada bo‘lib o‘tgan NATO sammitida gaplashgan.
“Men unga shunday dedim: Bu jarayonni eng yaxshi boshqara oladigan sizsiz. Odamlar, ayniqsa, oziq-ovqat navbatida turib o‘ldirilmoqda. Siz bu yerda aralashishingiz kerak,” deya qayd etgan Erdo‘g‘on.
BMT ma’lumotlariga ko‘ra, G‘azo sektorida yordam markazlaridan oziq-ovqat olish uchun kelgan falastinliklar o‘qqa tutilishi natijasida 700 dan ortiq inson halok bo‘lgan.
Isroil mart oyidan boshlab G‘azoni to‘liq blokadaga oldi. Yahudiy davlati gumanitar yuklarni AQSH tomonidan qo‘llab-quvvatlanadigan “G‘azo insonparvarlik jamg‘armasi” orqali yetkazishni boshladi. Biroq yordam olish uchun kelgan tinch aholi o‘qqa tutilmoqda.
Isroil armiyasi o‘ziga yog‘dirilgan tanqidlarni rad etib, tinch aholi o‘limida HAMASni aybladi. Jamg‘arma esa tinch aholi halok bo‘lgani haqidagi faktlarni inkor etmoqda.
