O‘zbekistonlik hujumchi Eldor Shomurodov “Roma” klubidagi murakkab davri va Klaudio Ranyeri qo‘l ostida yana o‘z o‘yinini topgani haqida gapirdi. Bu haqda Roma Press nashri xabar berdi.
Shomurodov Rim klubiga kelgach, paydo bo‘lgan muammolarni esladi.
“Roma”ga kelganimda Eden Jeko Rimdan ketmoqchi edi. O‘sha paytda tarkibdagi yagona hujumchi men edim va mavsum davomida asosiy tarkibda bo‘laman, deb o‘ylagandim. Ammo oradan ko‘p o‘tmay, matbuotda Temmi Abrahamning jamoaga kelishi va uning asosiy hujumchi bo‘lishi haqida xabarlar chiqdi. Men bunga ishonmagan edim, chunki jismoniy holatim yaxshi va klub zaxirada saqlash uchun transfer qilmagan deb o‘yladim. Ammo bu sodir bo‘ldi. “Roma”da o‘zimga bo‘lgan ishonchimni yo‘qotdim, hatto atrofdagilardan xato izlay boshladim. Kurashishni to‘xtatdim va bu mening o‘yinimni yanada pasaytirib yubordi. Hozirda o‘zimni butunlay boshqa futbolchidek his qilyapman. Buning uchun Klaudio Ranyeridan juda minnatdorman, deydi Shomurodov.
Eslatib o‘tamiz, Shomurodov yakunlangan mavsum ancha samarali o‘ynadi. U “Roma” safida barcha musobaqalar doirasidagi 37 uchrashuvda maydonga tushib, o‘z hisobiga 7 ta gol va 5 ta assist yozdirib qo‘ydi.
