O‘zbekiston terma jamoasi va Qarshining “Nasaf” klubi darvozaboni Abduvohid Ne’matovga Eron chempionatidan jiddiy qiziqish bildirilyapti. Futbolchiga yaqin manbaning “Daryo”ga ma’lum qilishicha, Tehronning nomdor klubi — “Persepolis” 24 yoshli posbonni o‘z safiga qo‘shib olish niyatida.
Eron terma jamoasi posboni Alirizo Beyranvand 2024-yilda “Persepolis”dan “Traktor” klubiga o‘tgach, jamoaning darvoza chizig‘ida ko‘plab muammolar paydo bo‘ldi. Tehronliklar ushbu kamchilikni yo‘qotish uchun “Nasaf” a’zosini o‘z safiga qo‘shib olishni istamoqda.
Ne’matov o‘tgan yilning yozida eronlik agent Hamid Merih bilan shartnoma imzolagach, uni fors chempionatiga o‘tishi borasida mish-mishlar paydo bo‘lgan edi. Ammo ma’lum sabablarga ko‘ra bu transfer amalga oshmay qolgan.
Eron klubi Abduvohidga yana qiziqish bildirmoqda va unga 2 yillik shartnoma taklif qilgan. Agar tehronliklar “Nasaf” bilan kelisha olsa, Ne’matov “Persepolis”da ikki yil ichida 6 million dollar ishlab olishi mumkinligi aytilmoqda.
Eslatib o‘tamiz, Abduvohid Ne’matov “Nasaf” tarbiyalanuvchisi hisoblanadi. U 2019-yildan beri qarshiliklar asosiy jamoasida o‘ynab keladi. Uning klub bilan shartnomasi 2025-yilning oxirigacha amal qiladi. Transfermarkt portali darvozabonning qiymatini 1,5 million yevroga baholamoqda.
Ma’lumot uchun, “Persepolis”da O‘zbekiston terma jamoasining boshqa bir a’zosi — Oston O‘runov ham harakat qiladi. U 2024-yilning boshida tehronliklar safiga o‘tgan edi.
