Londondagi “Chelsi” klubi hamda Argentina terma jamoasi a’zosi Enso Fernandesh faoliyatini Ispaniyada davom ettirishi mumkin. Bu haqda insayder Gustavo Mendеshga tayanib Euro-Football xabar bermoqda.
Manbaga ko‘ra, Fernandeshning xizmatlariga Madridning “Real” klubi jiddiy qiziqish bildirmoqda. Hatto tomonlar o‘zaro muzokaralar olib borib, kelishuvga erishgani aytilmoqda. Biroq hozircha hech qanday rasmiy hujjat imzolanmagan. U jamoadan ketishi mumkin bo‘lgan Luka Modrichga o‘rinbosar bo‘lishi kutilmoqda.
“Chelsi” Fernandeshni qo‘yib yuborishga tayyor, biroq “aristokratlar futbolchi uchun 120 million yevro talab qilmoqda. Ular bu orqali 2023-yil “Benfika”ga to‘lagan summani qaytarib olishni istamoqdа. Ensoning londonliklar bilan amaldagi shartnomasi 2032-yilgacha mo‘ljallangan. Transfermarkt portali uning qiymatini 75 million yevroga baholamoqda.
Ma’lumot uchun, Fernandesh joriy mavsum Angliya Premyer Ligasi doirasidagi 35 ta o‘yinda maydonga tushib, o‘z hisobiga 6 ta gol va 7 ta golli uzatma yozdirib qo‘ygan.
