“An-Nassr” hujumchisi Krishtianu Ronaldu hali futbol bilan xayrlashmoqchi emas. Bu haqda insayder Nikolo Skira xabar bermoqda.
40 yoshli portugaliyalik yulduzning Saudiya Arabistonidagi klub bilan tuzgan shartnomasi yozda yakunlanadi. Shunga qaramay, u yana kamida ikki mavsum davomida o‘ynashni rejalashtirgan. Ayni damda Ronalduga bir nechta takliflar tushgan va u yaqin kunlarda o‘z kelajagi haqida qaror qabul qiladi.
Joriy mavsumda Ronaldu “An-Nassr” safida 39 ta o‘yinda maydonga tushib, 33 ta gol va 4 ta golli uzatma amalga oshirdi.
Shunga qaramay, bir qator nashrlar xabariga ko‘ra, klub rahbariyati va futbolchining o‘zi shartnomani uzaytirish masalasida bir to‘xtamga kela olmayapti. Bunga sabab sifatida riyodliklarning Osiyo Chempionalar Ligasi yo‘llanmasiga ega chiqa olmagani ko‘rsatilmoqda.
Avvalroq Ronalduga “Chelsi”, “Al-Ahli”, “Beshiktosh”, “Los-Anjeles” hamda “Sporting” klublaridan taklif borligi haqida xabarlar tarqalgan edi.
