Madridning “Real” klubi hujumchisi Kilian Mbappe La Liganing 31-turidagi “Alaves”ga qarshi o‘yinda (1:0) to‘g‘ridan to‘g‘ri qizil kartochka oldi. Ispaniyaning yetakchi OAVlarida fransiyalik futbolchi bir necha o‘yinga diskvalifikatsiya qilinishi mumkinligi aytilmoqda.
Uchrashuv bosh hakami Sezar Soto Grado Kilianning maydondan chetlatilishi haqidagi bayonnomada uni “kurash paytida raqib oyog‘iga haddan tashqari kuch bilan bosgani” sababli maydondan chetlatilganini yozdi.
Ushbu holatda Mbappe 12 o‘yinlik diskvalifikatsiya bilan jazolanishi mumkin edi, ammo mavjud protokolga ko‘ra, Kilian atigi 3 o‘yinga chetlatilishi ehtimoli yuqori. Ispaniya matbuotida bu qaror uchrashuv bosh hakamining hisoboti asosida qabul qilinishi haqida yozildi. Agar hodisa “ayniqsa qo‘pol xatti-harakatlar” sifatida tasniflansa, Mbappe nafaqat keyingi bir necha turni, balki muhim “El-Klasiko”ni ham o‘tkazib yuborishi mumkin.
Maʼlumot uchun, Ispaniya kubogi final bahsi 26-aprel kuni o‘tkaziladi. Unda “Real” “Barselona”ga qarshi maydonga tushadi.
