Adliya katta maslahatchisi Abduqahhor Mullajonov Navoiy viloyati prokurori lavozimiga tayinlandi. Bu haqda Bosh prokuratura matbuot xizmati xabar berdi.
Tayinlovga qadar u 2023-yil sentyabridan buyon Toshkent viloyati prokurorining birinchi o‘rinbosari lavozimida ishlagan.
Abduqahhor Mullajonov prokuratura organlaridagi ish faoliyatini 2002-yilda Mirzo Ulug‘bek tuman prokuraturasida boshlagan. 2004-yildan boshlab, Toshkent shahar prokuraturasi bo‘limi katta tergovchisi, Sergeli tuman prokurori, Bektemir tuman prokurori lavozimlarida faoliyat yuritgan.
2018-yil iyulidan Bosh prokuratura voyaga yetmaganlar bo‘yicha qonunchilik ijrosi ustidan nazorat boshqarmasi boshlig‘i lavozimida, 2021-yil aprelidan Sirdaryo viloyati prokurorining o‘rinbosari lavozimida ishlagan.
2023-yil avgust oyidan Toshkent viloyatiga prokurorlik qilgan Sirojiddin Eshquvvatov 2024-yil sentyabrida Qurilish va uy-joy kommunal xo‘jaligi sohasida nazorat qilish inspeksiyasi rahbari lavozimiga o‘tkazilgach, Toshkent viloyati prokurori vazifalarini amalda viloyat prokurorining birinchi o‘rinbosari bo‘lgan Abduqahhor Mullajonov bajarib kelgan.
2025-yil 5-mart kuni Navoiy viloyati prokurori vazifasida ishlagan Azamat Mirzayev Toshkent viloyati prokurori etib tayinlandi.
