“Azov” jangchilari Toretsk yo‘nalishida 23 nafar rus askarini qo‘lga oldi. Bu haqda Ukraina Milliy gvardiyasi tarkibidagi brigada o‘zining Telegram kanalida ma’lum qildi.
Xabar berilishicha, asirlar orasida o‘z ixtiyori bilan taslim bo‘lganlardan tashqari, xandaq janglarida qo‘lga olingan va yerto‘lalardan topilganlar ham bor.
“Rossiya qurolli kuchlarining bu askarlari omon qolish baxtiga muyassar bo‘ldi, ularning barchasi Toretsk yo‘nalishidagi janglarda asirga olingan”, deb yozadi “Azov”.
Brigadaga ko‘ra, ular tegishli xizmatlarga topshiriladi. Ukrainaliklar ulardan kelgusida asirlarni ayriboshlash uchun foydalanishga umid qilyapti.
Avvalroq Ukraina armiyasi Kursk viloyatida ikki nafar shimoliy koreyalik harbiyni qo‘lga olib, so‘roqqa tutgani ma’lum bo‘lgandi.
Ukraina — Rossiya urushi
2022-yil Yevropa markazida boshlangan keng miqyosli urush 1056 kundan buyon davom etmoqda. Tomonlar otashkesim ehtimoli haqida tobora ko‘proq gapira boshlagan bo‘lsa-da, jang maydonida buning aks-sadosi ko‘rinmayapti. Eskalatsiya darajasi oshib bormoqda.
Mana shu kabi voqealar fonida Vladimir Putin Donald Tramp bilan Ukraina bo‘yicha muzokaralarda nimalarni talab qilishi haqida taxminlar ilgari surildi.
