Qirg‘iziston va Turkiya birgalikda kino va seriallar yaratishga kirishmoqda. Bu haqda Turkiy davlatlar tashkilotining XI sammiti doirasida Qirg‘iziston madaniyat, axborot, sport va yoshlar siyosati vaziri Oltinbek Maqsutov ma’lum qilgan.
“Bu bizga Turkiya bilan filmlar, videomateriallar va seriallar yaratishda hamkorlik qilish imkonini beradi. Biz o‘zaro tajriba almashamiz, bu, ayniqsa, global kino ishlab chiqarish muhiti sharoitida muhimdir. Yaqinda Italiya bilan ham shunday kelishuvga erishdik.
Boshqa mamlakatlar qatori sifatli filmlar suratga olish imkoniyatiga ega bo‘lamiz. 2025-yilda filmlar uchun pavilyonlar qurish rejalashtirilgan. Shuningdek, seriallar yaratish bo‘yicha ham hamkorlik qilamiz, chunki Turkiya o‘zining seriallari bilan mashhur”, deydi Oltinbek Maqsudov.
Uning aytishicha, tadbirda audio-vizual ishlar yo‘nalishi bo‘yicha hamkorlik kelishuvi imzolangan.
