Namanganda maktab o‘quvchisi boshqargan Gentra yuk mashinasi bilan to‘qnashgani va haydovchi vafot etgani haqida xabar berilgandi. Holat yuzasidan Namangan viloyati IIB YHXB axborot xizmati qo‘shimcha maʼlumot berdi.
Maʼlum qilinishicha, 2007-yilda tug‘ilgan, Namangan shahridagi 1-sonli kasb-hunar maktabi o‘quvchisi 300 ming so‘m evaziga ijaraga Lacetti avtomobilini olgan.
So‘ng uni soat 12:30 larda Namangan shahar, “Marg‘ilon” ko‘chasida yuqori tezlikda boshqarib borib, yo‘lni ikkiga ajratib turuvchi beton to‘siqdan o‘tib ketgan va qarama-qarshi tomonidan o‘z yo‘nalishida harakatlanib kelayotgan “Zil-138A” yuk mashinasi bilan to‘qnashgan.
Hodisa oqibatida Lacetti avtomashinasi haydovchisi og‘ir tan jarohati bilan shifoxonada vafot etgan.
Avtomashina salonida bo‘lgan 4 nafar o‘quvchi turli darajadagi tan jarohatlari bilan shifoxonaga yotqizilgan.
Hozirda mazkur holat yuzasidan Namangan shahar IIB Tergov bo‘limi tomonidan JKning 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismiga asosan jinoyat ishi qo‘zg‘atilgan.
Lacetti avtomashina egasi boshqarish huquqi bo‘lmagan shaxsga transport vositasini boshqarishga topshirgani yuzasidan ham tergovga qadar tekshiruv harakatlari olib borilmoqda.
