AQSH G‘azo sektori va Iordan daryosining g‘arbiy sohilidagi falastinliklarga 336 million dollar miqdorida qo‘shimcha gumanitar yordam ko‘rsatish niyatida.
Bu haqda Amerika xalqaro taraqqiyot agentligi (USAID)dagi manbalarga tayanib, Reuters agentligi xabar bermoqda.
Qayd etilishicha, moliyalashtirish ushbu hududlarga oziq-ovqat, dori-darmon va asosiy ehtiyojlarni yetkazib berish, shuningdek, Isroil armiyasining harakatlari tufayli uylarini tark etishga majbur bo‘lgan falastinliklarni kelayotgan qishda vaqtinchalik uy-joy bilan ta’minlash imkonini beradi.
USAID’ning bildirishicha, G‘azo sektori va G‘arbiy Sohil gumanitar inqiroz holatida.
“Qo‘shma Shtatlar mojaroning barcha tomonlarini sulhga va garovga olinganlarni zudlik bilan ozod qilishga, shuningdek, G‘azo sektoriga va uning ichida keng ko‘lamli gumanitar yordam yetkazib berish imkoniyatini ta’minlash bo‘yicha kelishib olishga chaqiradi”, deyiladi agentlik xabarida.
