Maktabgacha va maktab ta’limi vaziri Hilola Umarova Toshkentda maktab direktorlariga bosim o‘tkazib, ta’lim dargohidagi oshxonalarni auksionda sotayotgan amaldorlarga qarshi kurashilishi, hududdagi maktab oshxonalarining sotuvi to‘xtatilishini ma’lum qilgandi.
“Daryo”ga kelib tushgan ma’lumotlarga ko‘ra, Toshkent shahrining Sergeli, Yangihayot va Bektemir tumanlarida vazir topshirig‘iga zid harakatlar amalga oshirilmoqda.
Bu haqda “Daryo”ga ma’lumot bergan mas’ullardan biriga ko‘ra, 20-sentyabr kuni Yangihayot tuman maktabgacha va maktab ta’limi bo‘limi mudiri Dilfuza Mustafayeva tumandagi maktab direktorlari uchun yig‘ilish o‘tkazib, barcha direktorlarga maktab oshxonalarini auksion savdoga chiqarish topshirig‘ini bergan.
20-sentyabr kuni soat 16:30 da bo‘limda maktab direktorlari uchun yig‘ilish bo‘lishi e’lon qilingan. Mazkur yig‘ilishda bo‘lim mudiri tomonidan barcha direktorlarga topshiriq berilib, 21-sentyabr kuni soat 13:30 gacha maktab oshxonalarini auksion savdoga chiqarish to‘g‘risida xatlar tayyorlanishi kerakligi uqtirilgan, deydi manba.
Manbaning bildirishicha, Yangihayot tumanidagi 2-sonli umumta’lim maktabi oshxonasi kecha, 20-sentyabr kuni auksionda sotilgan.
Yangihayotdagi maktab oshxonasi kecha, 20-sentyabr kuni 169 million 500 ming so‘mga sotildi. Vazir Hilola Umarova avgust oyida jurnalistlar bilan uchrashganda maktab oshxonalari sotilmasligini, harakatlar to‘xtatilishini aytgandi. Shunga qaramasdan Yangihayot tumanida vazir topshirig‘iga zid ishlar qilinmoqda, deydi manba.
Manbaning qo‘shimcha qilishicha, ayni kunda Sergeli tumanidagi 267- va 269-maktab oshxonalari, Bektemir tumanidagi 290- va 291-sonli maktab oshxonalari auksion savdoga qo‘yilgan. Muddati kelgach, ular ham sotiladi.
“Daryo” jurnalisti bilan telefon orqali muloqotda bo‘lgan Yangihayot tuman maktabgacha va maktab ta’limi bo‘limi mudiri Dilfuza Mustafayeva nafaqat maktab direktorlariga oshxonalarini sotuvga qo‘yish bo‘yicha topshiriq berganini, kecha, 20-sentyabr kuni yig‘ilish qilganini ham inkor etdi. Biroq jurnalist bilan suhbatda bo‘lgan shu tumandagi 3- va 304-maktab direktorlari 20-sentyabr kunlari “RayONO”ga yig‘ilishga chaqirilganini tasdiqladi.
Yig‘ilishga chaqirilgan edik, lekin men borolmadim. Shu sabab yig‘ilishda nimalar haqida gapirilganini, qanday topshiriq berilganini bilmayman, deydi 3-maktab direktori.
304-maktab direktori esa jurnalist bilan suhbat davomida Telegram’iga qarab, 20-sentyabr kuni yig‘ilishga chaqirishganini, buni 21-sentyabr kuni bilayotganini aytdi.
Men yig‘ilish haqida hozir, siz aytganingizdan keyin bilyapman. Haqiqatan ham kecha, soat 16:30 da yig‘ilishga chaqirilgan ekanmiz. Ammo men bormagan ekanman. Eng qizig‘i kimdir nega yig‘ilishga kelmadingiz ham deb so‘ramabdi-da, deydi tumandagi 304-maktab direktori.
Suhbatdosh direktorlar — 3- va 304-maktab direktorlari ular rahbarlik qilayotgan muassasa oshxonasini auksionda sotish bo‘yicha shu kecha-kunduzda hech kimdan topshiriq bo‘lmaganini aytmoqda. Shuningdek, ular ijara markaziga maktab oshxonalarini auksionda sotish bo‘yicha xat ham berilmaganini ma’lum qildi.
Vazir topshirig‘idan so‘ng boshqarma orqali maktab oshxonalari sotilmasligi kerakligi aytilgan. Biz yuqori tashkilotimiz qanday topshiriq bersa, shuni bajaramiz, deydi maktab direktorlaridan biri.
“Daryo” jurnalisti Yangihayot tuman maktabgacha va maktab ta’limi bo‘limi mudiri Dilfuza Mustafayeva bilan muloqot qilar ekan, vazir topshirig‘iga zid ravishda u rahbarlik qilayotgan tumandagi 2-sonli maktab oshxonasi sotuvga qo‘yilgani sababini so‘radi. Bo‘lim mudiri tumanda endigina ish boshlaganini, ushbu maktab oshxonasi auksionda sotilganidan xabari yo‘qligini aytdi. Bu haqda surishtirib, ma’lumot olgach, xabar berishini qo‘shimcha qildi.
Vazir Hilola Umarovaning matbuot kotibi, Maktabgacha va maktab ta’limi vazirligi axborot xizmati rahbari Dilfuza Sobirova Yangihayot, Sergeli va Bektemir tumanlaridagi maktab oshxonalarining auksionda sotuvga qo‘yilganidan bexabar ekanini, bu bo‘yicha surishtirib, vazir topshirig‘iga qarshi qilingan ish o‘rganilayotganini ma’lum qildi.
Izoh (0)