Fransiyaning Parij shahrida yozgi Olimpiada bahslari bo‘lib o‘tmoqda.
Olimpiada doirasida boks musobaqasining +92 kggacha bo‘lgan bokschilar o‘rtasidagi final bahsida o‘zbekistonlik bokschi Bahodir Jalolov ispaniyalik Ayyub Gadfaga qarshi jang qildi.
Birinchi raund Jalolovning to‘liq ustunligida o‘tdi. U raqibini ikki bor nokdaun holatiga tushirdi.
Ikkinchi raundda ham 5:0 hisobida o‘zbekistonlik bokschining ustunligi qayd etildi. Uchinchi raundda ham raqibiga imkon qoldirmagan Bahodir ketma-ket ikkinchi bor Olimpiya o‘yinlari oltin medalini qo‘lga kiritdi.
Bahodir bundan oldingi bosqichlarda norvegiyalik Omar Shihaga hech qanday imkoniyat qoldirmagan edi, shuningdek, avstraliyalik Teremoana Teremoanani taslim etgandi. Yarim finalda esa germaniyalik Nelvie Tiafak mag‘lub etilgandi.
