Jem Adrian taxallusi bilan tanilgan turkiyalik qo‘shiqchi va kompozitor Jem Feliz Turkiyaning Van shahridagi “Van Kültür Yo‘lu” festivalida ishtirok etayotgan vaqtda hujumga uchradi. Bu haqda Turkiya OAVlari xabar bermoqda.
Tomoshabinlardan biri sahnada qo‘shiq ijro etayotgan xonandaga qarata ichi suvga to‘ldirilgan plastik butilkani uloqtirdi. Qattiq og‘riqqa qaramay, Adrian konsertni to‘xtatmadi va tomoshabinlarning olqishlari ostida qo‘shiq kuylashda davom etdi.
Konsertdan so‘ng xonanda xavotir olgan muxlislarini tinchlantirish uchun Instagram’da ular uchun alohida xabar qoldirdi:
Kecha men bilan sodir bo‘lgan noxush hodisa to‘g‘risidagi xabarlar va unga yozilgan sharhlarni o‘qib chiqdim. Azizlar, hozirda o‘zimni juda yaxshi his etyapman! Xavotir olmang, hammasi yaxshi. Men go‘yo atirgul bog‘ida edim, gulning bir nechta tikani kayfiyatimni buzmaydi. Tikanlarni deb atirgulni sevishdan to‘xtamayman, sizni yaxshi ko‘raman! Tadbir ajoyib o‘tdi. Van, sendan minnatdorman!, — deb yozdi Adrian.
Van madaniyat festivali (Van Kültür Yolu Festivali) 2024-yil 29-iyundan 7-iyul kuniga qadar bo‘lib o‘tdi. Turkiya Madaniyat va turizm vazirligi tomonidan tashkil etilgan mazkur tadbirda mamlakatning boy madaniy merosini nishonlash va targ‘ib qilindi hamda turli madaniy tadbirlar, tomoshalar o‘tkazildi.
Ma’lumot uchun: Van — Turkiyada, Van ko‘lining sharqiy qirg‘og‘ida joylashgan shahar.
Izoh (0)