Jahon boks assotsiatsiyasi (WBA) ikkinchi yarim yengil (-55,34 kg) vazn toifasida mutlaq jahon chempioni Naoya Inoue (27-0, 24 KO) kamarini majburiy da’vogar Murodjon Ahmadaliyevdan (12-1, 9 KO) himoya qilishga buyruq berdi.
Tashkilot tomonlarga rasmiiy maktub yuborib, har ikki jamoaga jang haqida xabar berdi. Muzokaralar olib borish uchun 14-iyulgacha muddat belgilandi. Tomonlar bu muddat ichida kelisha olmasa, kimoshdi savdolari o‘tkaziladi.
Reglamentga ko‘ra, chempion kamarni qo‘lga kiritgan kundan boshlab 9 oy ichida mavjud bo‘lgan eng yaxshi da’vogarga qarshi unvonini himoya qilishi kerak.
Jang muddati tasdiqlansa, Ahmadaliyev o‘zbek bokschilari ichida birinchi bo‘lib bir yo‘la to‘rtta asosiy chempionlik kamarlari — WBC, WBA, IBF va WBO uchun ringga chiqadi.
Inoue mutlaq chempionga aylanganidan so‘ng ilk bor may oyida Marlon Tapalesga qarshi ringga ko‘tarilib, kamarlarini himoya qilgan edi. Jang 6-raundda yaponiyalik bokschining nokaut evaziga g‘alabasi bilan yakunlangandi.
Ahmadaliyev esa 2023-yilning dekabr oyida Kevin Gonsalesga qarshi jang qilgandi. Qarama-qarshilikning 8-raundida o‘zbekistonlik bokchi raqibini texnik nokautga uchratib, g‘alaba qozongan edi.
