Qashqadaryoda nemis bog‘chasi tashkil etiladi

Qashqadaryoda O‘zbekiston-Germaniya qo‘shma loyihasi asosida nemis maktabgacha ta’lim tashkiloti tashkil etiladi. Bu haqda viloyat MMTB xabar berdi. 

Unga ko‘ra, Qashqadaryo viloyati hokimligining tegishli ishchi guruhi hamda Germaniyaning Klett Group kompaniyasi boshqaruv direktori Filipp Hausman ishtirokida ikki tomonlama muzokaralar o‘tkazildi. Muzokaralar davomida viloyat hokimi o‘rinbosari tomonidan viloyatda O‘zbekiston-Germaniya qo‘shma loyihalarini amalga oshirish uchun barcha imkoniyatlar va sharoitlar mavjudligi ta’kidlandi.

Klett Group kompaniyasi boshqaruv direktori janob Filipp Hausman Qashqadaryo viloyatida qator ijtimoiy sohalarda jumladan, maktabgacha ta’lim, dual ta’lim va bandlik yo‘nalishlari bo‘yicha hamkorlikdagi qo‘shma loyihalarni qo‘llab quvvatlashini bildirdi. 

Muzokaralar yakunida Klett Group kompaniyasi vakillari yaqin kunlarda Qashqadaryoga tashrif buyurishi hamda muzokaralar davom etishi ma’lum qilindi.