“Tolibon” bosh vazirining siyosiy o‘rinbosari Maulvi Abdul Kabir Afg‘onistonda ISHID faoliyati bostirilgani, hech kim terror tashkilotini kuchli ko‘rsatish uchun lobbichilik qilmasligi kerakligini aytdi. Bu haqda Aamaj News xabar berdi.
“Tolibon” rasmiysi tegishli bayonotni Kobulda ba’zi mamlakatlar elchilari, BMT va Yevropa Ittifoqi vakillari ishtirokidagi iftorlik ziyofatida aytdi. U diplomatlarni Afg‘oniston tuprog‘ini boshqalar uchun tahdidga aylantirishga yo‘l qo‘ymasligiga ishontirdi.
“ISHID Afg‘oniston, mintaqa va dunyoning dushmani, hech kim bu guruhni kuchaytirishga urinmasligi kerak”, — dedi u.
So‘nggi oylarda Afg‘onistonning Qandahor, Eronning Kermon va Rossiyaning Moskva viloyatidagi ISHID hujumlaridan so‘ng, ayrim davlatlar bu guruh faoliyatining kengayishidan xavotir bildirdi.
Maulvi Abdul Kabirning qo‘shimcha qilishicha, “Tolibon” o‘zining iqtisodga yo‘naltirilgan tashqi siyosati tufayli barcha davlatlar bilan yaxshi munosabatlarga ega bo‘lishni istaydi va mintaqa davlatlari birgalikda mintaqaviy tashabbuslarni yaratishi va mustahkamlashi mumkin.
Izoh (0)