Qashqadaryo viloyatida isteʼmolga yaroqsiz alkogol mahsulotlarini muomalaga kiritilishining oldi olindi, deb xabar beradi Bosh prokuratura huzuridagi departament.
Qayd etilishicha, departamentning Koson tuman bo‘limi tomonidan tuman IIB xodimlari bilan hamkorlikda tezkor tadbir o‘tkazilgan. Tadbirda A.Z. ismli shaxs noqonuniy daromad orttirish maqsadida Kasbi tumani “Tinchlik” MFY hududida ikki nafar fuqaroga jami 600 dona “Russkaya vodka” nomli isteʼmolga yaroqsiz va qalbaki aksiz markali alkogol mahsulotini sotgan vaqtida ashyoviy dalillar bilan ushlangan.
Shu kabi, departamentning Yakkabog‘ tuman bo‘limi tomonidan o‘tkazilgan tezkor tadbirda “A.” MCHJ rahbari A.A. Qamashi tumani “O‘zbekiston” MFY hududida xaridorga jami 320 dona “Russkaya vodka”, “Ne vodka”, “Shahrisabz” va “Sabranie” nomli isteʼmolga yaroqsiz va qalbaki aksiz markali alkogol mahsulotini sotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Xorazm viloyatida isteʼmolga yaroqsiz alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)