Diniy voiz Abror Muxtor Aliy 15 sutkalik ma’muriy qamoq jazosini o‘tab, ozodlikka chiqdi. Bu haqda “Daryo”ga Oliy sud axborot xizmati rahbari Aziz Abidov xabar berdi.
Mas’ulning bildirishicha, Abror Abduazimov 15 sutka ma’muriy qamoqni 13 sutkada yakunlagan.
“Oliy sud Jinoyat ishlari bo‘yicha sudlov hay’ati taftish instansiyasining 2024-yil 20-fevraldagi qaroriga muvofiq Abror Abduazimov (1976-yilda Toshkent shahrida tug‘ilgan, muqaddam ma’muriy javobgarlikka tortilgan)ga nisbatan jinoyat ishlari bo‘yicha Shayxontohur tuman sudining 2024-yil 6-fevraldagi qarori bilan tayinlangan ma’muriy qamoq jazosi muddati o‘zgartirilib, ozodlikka chiqarildi”, — deydi Aziz Abidov.
Unga 15 sutka ma’muriy qamoq tayinlangan sud qarorida keltirilishicha, u 6-fevral kuni Shayxontohur tuman hokimligiga sherigi Xusrav Nasrullayev bilan birga borib, baqir-chaqir qilib janjal ko‘targan. Ularning o‘zaro janjaliga aniqlik kiritish maqsadida kelgan militsiya xodimlari qonuniy talablarini bajarmagan. Xodimlarga bo‘ysunmasdan, ommani o‘ziga jalb qilib, IIO xodimlariga nisbatan soxta uydirmalarni tarqatgani aniqlangan.
Sud majlisida har ikki huquqbuzar jahl ustida janjal ko‘targanini va IIO xodimlari talablarini bajarmaganini tan olib, qilmishidan pushaymonligini, bu kabi holat boshqa takrorlanmasligini bildirib, suddan yengillik berishni so‘ragan.
Abror Abduazimov va Xusrav Nasrullayev Ma’muriy javobgarlik to‘g‘risidagi kodeksining 194-modda (Ichki ishlar organlari xodimining qonuniy talablarini bajarmaslik) va 195-moddasida (Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) ifoda qilingan huquqbuzarlikni sodir etishda aybli deb topilgan. Ularga 15 sutka ma’muriy qamoq va BHMning 1 baravari, ya’ni 340 ming so‘m jarima jazosi tayinlangandi.
Izoh (0)