Eronda Mahsa Aminiyning amakisi Safo Aaeli Islom respublikasi oliy rahnamosini haqorat qilish va hukumatga qarshi tashviqot olib borish kabi bir qancha ayblar bilan besh yil-u to‘rt oy va 17 kunga qamaldi. Bu haqda Hengaw xabar berdi.
Huquq himoyachilariga ko‘ra, sud dastlab 30 yoshli Aaelini bir necha muddatga hukm qilgan: ichki xavfsizlikka qarshi fitna uyushtirgani uchun 3,5 yil, Oyatulloh Xomanaiyni haqorat qilgani uchun 15 oy va Eron rejimiga qarshi tashviqoti uchun 7 oy 17 kun.
Biroq sud Aaelining ma’lum muddat hibsda bo‘lganini inobatga olgan. Shunday qilib, barcha jazolar sarhisob qilinib, eronlik erkak qariyb 5,5 yillik qamoq jazosiga hukm qilingan. Sudya jinoiy qoidani qo‘llagan, unga ko‘ra ayblanuvchi jazoni qismlarga bo‘lib o‘tashi mumkin: belgilangan muddatning bir yil ikki oyini uch yillik tanaffus bilan o‘taydi. Biroq olingan pauza vaqtida Aaeli har oy razvedka xizmatiga hisobot berishi, shuningdek, ta’lim va diniy kurslardan o‘tishi kerak bo‘ladi.
Sud eronlikka qamoqda bo‘lgan vaqtida “Ayollar, hayot, erkinlik” harakati noroziliklari paytida o‘ldirilgan xavfsizlik xodimi haqida biografik maqola yozishni, ularni mahbuslar o‘rtasida tarqatishni va nashrning audio versiyasini mahalliy ijtimoiy tarmoqlar uchun yozib olishni buyurgan. Shuningdek, Aaeliga ikki yil davomida hukumatga qarshi fikr bildirish va Eron tashqarisiga chiqish taqiqlangan.
Izoh (0)