Dekabr oyi boshida baʼzi viloyatlardagina metan zapravkalarga cheklov kiritilgan bo‘lsa, 8-dekabr kuni bu tartib O‘zbekiston bo‘yicha joriy etilgan edi.
Keyinroq, 12-dekabrdan gaz zapravkalar soat 06:00 dan 12:00 gacha ishlash rejimiga o‘tgandi. Bu kunning ertasiga, 13-dekabr kuni poytaxt, Samarqand, Toshkent, Andijon, Namangan va Farg‘ona viloyatlaridagi AGTKSHlarning faoliyatiga qo‘shimcha cheklovlar kiritildi. Mazkur viloyatlarga kiritilgan cheklov 15-dekabrdan yumshatildi, lekin to‘la ochilganicha yo‘q.
Energetika vaziri matbuot kotibi Hasan Toshxo‘jayev “Daryo”ning qachon va qay sharoitda cheklovlar butunlay olib tashlanishi mumkinligi haqidagi so‘roviga javob berdi.
“Kuz-qish faslining har qanday ob-havo sharoitida faoliyat ko‘rsatish bo‘yicha ishlab chiqilgan algoritmlarga ko‘ra, aholi va ijtimoiy soha obyektlarining tabiiy gazga nisbatan talabi kamaygani sayin metan zapravkalarga qo‘yilgan cheklovlar yumshatilib, vaziyatdan kelib chiqilgan holda bekor qilinadi.
Kelgusi 10 kunlik va oy yakuniga qadar “O‘zgidromet” tomonidan berilgan prognozlardan kelib chiqib, kelgusi haftadan eʼtiboran barcha AGTKSHlar to‘la quvvat bilan ishlashini taxmin qilishimiz mumkin”, — dedi Hasan Toshxo‘jayev.
Qo‘shimcha qilinishicha, tashqarida ob-havoning qanday bo‘lishiga bog‘liq ravishda, hududlar doirasida vaqt bo‘yicha cheklovlar saqlanib qolishi ham mumkin.
Izoh (0)