Tesla Shimoliy Amerikada o‘zining Cybertruck pikapini sotishni boshladi, deb e’lon qildi kompaniya rahbari Ilon Mask.
Elektropikapning eng arzon versiyasi 60 990 dollar turadi, bu 2019-yilda va’da qilingan 40 000 dollardan sezilarli darajada ko‘p, deya qayd etdi Reuters. Pikapning eng kuchli versiyasi — Cyberbeast, shuningdek, to‘liq privodga ega versiyalari 2024-yildan boshlab mos ravishda 100 000 va 80 000 dollarlik boshlang‘ich narxlarda xaridorlarga taqdim etiladi.
“Cybertruck allaqachon Shimoliy Amerikadagi Tesla do‘konlariga yo‘l olgan”, — deb yozgandi Ilon Mask o‘tgan hafta X ijtimoiy tarmog‘idagi sahifasida. Kompaniya ma’lumotlariga ko‘ra, mashina 1,5 tonnadan ortiq yukni tashishga qodir. 2,9 soniyada 96 km/soat tezlikka chiqadi va bir marta zaryad qilinganida 800 kilometrgacha yuradi.
Tesla Cybertruck uchun 2 millionta oldindan buyurtma olgan
Cybertruck — bu Teslaning deyarli to‘rt yil ichida chiqargan ilk yangi modeli.
“Cybertruck bilan o‘zimizga qabr qazidik”, — deb tan olgan Maskning o‘zi savdo boshlanishidan bir necha kun oldin. U pikap sotuvi daromad keltirgunga qadar bir yildan 18 oygacha vaqt kerak bo‘lishini tushuntirdi.
Avvalroq Mask Tesla 2025-yilda yiliga 250 000 ta pikap ishlab chiqarish quvvatiga yetishi mumkinligini ma’lum qilgandi, deb yozadi Reuters. Cybertruck buyurtmalari allaqachon 2 milliontaga yetdi.
Izoh (0)