O‘zbekistonda aholiga ajratiladigan mikroqarz miqdorini oshirish taklif qilinmoqda. Bu bo‘yicha Markaziy bank qonun loyihasini muhokamaga qo‘ydi.
Unda qayd etilishicha, bugungi kunda aholining mikromoliyaviy xizmatlarga bo‘lgan talabining oshib borayotgani ularning mazkur xizmatlarga bo‘lgan ehtiyojini qondirish uchun shart-sharoitlarni qulaylashtirish zarurligini ko‘rsatmoqda.
Shu maqsadda ushbu qonun bilan jismoniy shaxs bo‘lgan qarz oluvchiga ajratiladigan mikroqarz miqdori 50 million so‘mdan 100 million so‘mga oshirilmoqda. Buning natijasida aholining faol qismi mikromoliyaviy xizmatlardan foydalangan holda o‘zini o‘zi band qilishi yoki tadbirkorlik faoliyatini yo‘lga qo‘yishi orqali tadbirkorlik subyektiga aylanishiga erishish mumkin.
Loyihaning tushuntirish xatida qayd etilishicha, mikroqarz miqdorini oshirishda xorijiy davlatlarning tajribasi o‘rganildi. Xususan,
- Rossiyada jismoniy shaxslar uchun ajratiladigan mikro qarzlar 500 ming rubl (61 million so‘m), yuridik shaxslar uchun esa 5 mln rubl (610 mln so‘m) ni tashkil etadi.
- Qozog‘istonda lombardlar tomonidan aholi uchun oylik hisob-kitob ko‘rsatgichining 8 ming baravari (717 million so‘m), mikromoliya tashkilotlari tomonidan yuridik va jismoniy shaxslarga oylik hisob-kitob ko‘rsatkichining 20 ming baravari (1 794 million so‘m) miqdorida ajratiladi.
Bugungi kunda O‘zbekistonda faoliyat yuritayotgan nobank kredit tashkilotlarining soni 169 ta bo‘lsa, shundan 85 tasi mikromoliya tashkilotlari, 84 tasi esa lombardlar hisoblanadi.
Nobank kredit tashkilotlari tomonidan ko‘rsatilgan mikromoliyaviy xizmatlar miqdori 2023-yilning 6 oyi davomida — 3,35 trln so‘mni tashkil etib, uning hajmi o‘tgan yilning mos davriga nisbatan 58 foizga (1,23 trillion so‘mga) oshgan. Tijorat banklari tomonidan esa aholiga 2023-yilning 6 oyida 12,9 trillion so‘mlik mikroqarzlar ajratilgan.
Hujjatda ta’kidlanishicha, mazkur qonun loyihasining qabul qilinishi davlat budjetidan qo‘shimcha mablag‘larni talab etmaydi, Yagona portalda joylashtirilgan va belgilangan tartibda tegishli vazirliklar va idoralar bilan kelishildi.
O‘zbekistonda jismoniy shaxslarga beriladigan mikroqarzlar miqdori so‘nggi marta 2019-yilda oshirilgandi.
Izoh (0)