Toshkentning Sergeli tumani “Quruvchilar” dahasida joylashgan omborxonada yuz bergan portlash yuzasidan hukumat komissiyasi tuzildi.
Bosh vazir matbuot kotibi Bekzod Hidoyatovning maʼlum qilishicha hukumat komissiyasi Shavkat Mirziyoyev topshirig‘iga asosan Ochilboy Ramatov boshchiligida tuzildi.
Komissiya sodir bo‘lgan favqulodda hodisani o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha ish olib boradi. Komissiya tomonidan hududda olib borilayotgan ishlar yuzasidan axborot berib boriladi.
Toshkent shahri Sergeli tumanidagi “Quruvchilar” dahasida Inter Logistics MCHJga qarashli omborxonada kuchli portlash va yong‘in 28-sentyabr kuni tunda sodir bo‘lgandi. Hodisa aks etgan tasvirlar ijtimoiy tarmoqlarda keng tarqaldi.
FVV bergan ma’lumotga ko‘ra, soat 02:43 da yong‘in sodir bo‘layotgani to‘g‘risida FVBga xabar tushgan. Shunga ko‘ra, 16 ta yong‘in-qutqaruv ekipaji va 3 ta avtonarvon soat 02:48 da hodisa ro‘y bergan hududga yetib borgan. Yong‘inni o‘chirish ishlari amalga oshirilgan.
Sog‘liqni saqlash vazirligiga ko‘ra, ushbu hodisa oqibatida jabrlanganlarning umumiy soni 163 nafarni tashkil etmoqda. Shundan jami 24 nafari Respublika shoshilinch tibbiy yordam ilmiy markazi va uning Toshkent viloyati filiali, Toshkent shahar tez tibbiy yordam shifoxonasi, 1-sonli Respublika va 1-sonli shahar klinik shifoxonalari hamda 1-sonli shahar tug‘uruqxonasiga yotqizilgan. Qolgan 138 nafar jabrlangan aholi vakilining salomatligi yaxshi bo‘lgani uchun ambulator tibbiy yordam ko‘rsatilib, uyiga javob berilgan.
Hodisa oqibatida 2006-yilda tug‘ilgan bir nafar o‘smir bola voqea joyida vafot etgan va shifoxonaga tiriklik alomatlari bo‘lmagan holda olib kelingan.
Izoh (0)