Eron xavfsizlik xizmati xodimlari afg‘onistonlik chegarachilarga chegara protokollarini o‘rgatishga tayyor. Bu haqda Eron Qurolli kuchlari Bosh qo‘mondoni o‘rinbosari Qosim Rizoiy ma’lum qildi, deb xabar bermoqda “Daryo”ning Afg‘onistondagi muxbiri.

Rizoiyning aytishicha, Tehron harbiylarni o‘qitishga tayyorligini ma’lum qilgan, biroq Afg‘oniston chegara kuchlari hozircha mashg‘ulotlarga kelmagan.

Eronlik amaldor, shuningdek, afg‘on chegara kuchlarining turli tuman kiyimlarini tanqid qilib, ular muayyan formada bo‘lishi va xalqaro qonunlarga rioya qilishi zarurligini ta’kidladi.

Eslatib o‘tamiz, 27-may kuni Afg‘oniston—Eron chegarasidagi postlardan birida to‘qnashuv yuz berdi. Eron tomonidan ikki nafar chegarachi, “Tolibon” tomonidan bir nafar harbiy halok bo‘lgani aytilmoqda. Har ikki tomonning markaziy hukumatlari vazminlik bilan reaksiya bildirishi sabab eskalatsiyaning oldi olindi.

Qator tahlilchilarning fikricha, bu nizoga 1973-yilda Afg‘oniston va Eron o‘rtasida tuzilgan suv taqsimlanishi shartnomasining buzilishi sabab bo‘lgan bo‘lishi mumkin.

Bir necha kun o‘tib, “Tolibon” qo‘mondonlaridan biri Eronni bosib olish bilan tahdid qildi.