Qashqadaryo viloyatida Ichki ishlar xodimlarining navbatchi ayblovi — Maʼmuriy javobgarlik to‘g‘risidagi kodeksning 183-moddasi, yaʼni mayda bezorilikda ayblangan blogerlar 5 sutkaga qamalgandi. Sud jarayonidan xabardor “Daryo” manbasining bildirishicha, sud bodikamera yozuvlarini ko‘rmay, qaror chiqargan.

“Umid (Kapitan Karimov nazarda tutilmoqda. Tahririyat izohi) sudda bodikamera yozuvlari ko‘rilmaganidan norozi bo‘ldi. U sudga kirishidan avval ham umuman aybi yo‘qligini, Ichki ishlar xodimlariga bu to‘xtab turgan mashina-ku, deb gapirgani uchun aybdorga chiqarilayotganini aytgandi”, — deydi vaziyatdan xabarodor bo‘lgan bloger Azizbek Yazdurdiyev.

Viloyat Ichki ishlar boshqarmasi maʼlumotiga tayanilsa, 29-may kuni taxminan soat 10:20 larda Shahrisabz shahar IIB, YHXB xodimlari “Pillakashlik” mahallasining Pillakashlik ko‘chasida 2 ta avtomobil davlat raqamisiz, oynalari to‘liq qoraytirilgan holda turganini ko‘rgan. Shunda mazkur Gentra rusumli avtomashinalarga nisbatan hujjatlarni rasmiylashtirish ishlari boshlanganda transport vositalari haydovchilari ichki ishlar organlari xodimlarining qonuniy talablarini bajarmasdan janjal chiqarib, ommani o‘ziga qaratgan.

Blogerlar Maqsud Muzaffarov hamda Umid Karimovlar bilan bog‘liq mazkur vaziyat haqida qisqa fursatda hujjatlar rasmiylashtirilib, Jinoyat ishlari bo‘yicha Shahrisabz shahar sudiga yuborilgan.

Sudning 2023-yil 29-may kunidagi qaroriga ko‘ra, blogerlar va ularning sherigi Maʼmuriy javobgarlik to‘g‘risidagi kodeksning bir nechta moddalari bilan aybdor deb topilgan va ularning har biriga 5 sutkadan maʼmuriy qamoq jazosi tayinlangan.

“Daryo” blogerlar ishi ko‘rib chiqilgan sudda bloger Kapitan Karimovning talabi — bodikamera yozuvlari ko‘zdan kechirilganmi yoki yo‘qmi, videolar inobatga olinganmi, degan savollarga aniqlik kiritish uchun viloyat IIB hamda viloyat sudi masʼullaridan javob olishga urindi.

Viloyat IIB axborot xizmati rahbari Javlon Baxtiyev bodikameralardagi mavjud videolarni ko‘rmaganini, sud ishida mazkur videolar taqdim qilingan yoki qilinmaganidan xabari yo‘qligini bildirgan bo‘lsa, viloyat sudi axborot xizmati rahbari Farhod Mahmudov esa “Daryo”ning bu haqdagi savoliga javoban bodikameralardagi videolar haqida sud materiallarida ko‘rsatilmaganini maʼlum qildi.

Masʼullar bergan javobdan anglashilishicha, sudda katta ehtimol bilan blogerlar va IIB xodimlari muloqoti aks etgan bodikamera videotasvirlari ko‘rilmagan.

“Sudda bodikamera yozuvlari ko‘rilmagan bo‘lsa, sud hujjatlarida qanday qilib blogerlar IIB xodimlarini sensiragan, ularni haqorat qilgan, obro‘sizlantirgan degan xulosalar berilyapti? Sud guvohlar, javoblanuvchilar va gumondorlarni eshitib, ular taqdim qilgan dalillarga asoslanib, qaror qabul qilmaydimi?” — deydi bloger Azizbek Yazdurdiyev mazkur voqea haqida fikr bildirar ekan.

“Daryo”ning yana bir manbasi esa bodikameralardagi videolarni ko‘rganini, unda blogerlar haqiqatan ham Ichki ishlar xodimlari bilan tortishgani aks etganini aytmoqda.

“Bodikameradagi videolarni ko‘rib chiqdim. Haqiqatan ham videoda Umid va Maqsud IIB xodimlari bilan tortishgani ko‘ringan. Lekin YHXB boshlig‘i bu videolarni hech qayerga bermayapti. Faqat kecha sudga taqdim qilingan ekan”, — deydi manba.

Jamoatchilik blogerlar mayda bezorilikda, IIB xodimlariga bo‘ysunmaganlikda ayblanayotgan bo‘lsa, nega bodikameralar videosi ommaga namoyish qilinmayapti, degan savollarni bermoqda. “Daryo” jamoatchilikni qiziqtirayotgan video haqida Ichki ishlar vazirligi axborot xizmati rahbari Shohrux G‘iyosov bilan bog‘lanib, YPX inspektorining bodikamerasiga tushgan videotasvirlarni olish tartibi qandayligi bilan qiziqdi.

“Sudga rasmiy xat bilan chiqish kerak”, — deydi Shohrux G‘iyosov YPX inspektorlarining bodikamerasidagi videolarni olish haqida gapirar ekan. Viloyat sudi axborot xizmati rahbari Farhod Mahmudov esa “Agar bodikamera tasvirlari kerak bo‘lsa, IIBdan xat orqali olsangiz bo‘ladi”, — dedi. 

“Daryo” voqealar rivojini kuzatishda davom etadi.